VIGAN CITY – Addan pamalpalatpatan dagiti kameng ti Bantay Municipal Police Station iti pannakatay ni Rudy Pascua, agtawen iti tallopulo ket dua a taga-Ora West, Bantay a napaltugan idiay Brgy. Sinabaan.
Iti pannaki-uman ti Bombo Radyo Vigan ken ni Pmaj. Juan Jhayr Maggay, awan ti rekord ti biktima iti barangay ken iti nasao a police station kasta payen a positibo ti komento kenkuana dagiti katrabahoanna.
Agmanmaneho iti traysikel ti biktima nga agawid kadua ti pasaherona idin ta pinaltugan dagiti saan pay a nabigbig a suspek.
Nagsagaba iti tama ti bala ti caliber 45 a paltog iti bukot ken abaga ti biktima a puon ti nakatayanna ken uppat a kapsula ti naala iti nakapasamakan ti krimen
Pinasingkedan ni Pmaj. Maggay nga ikagumaanda a kitaen dagiti CCTV footage a mangtulong kadakuada a mangted iti naan-anay nga impormasion.
Nupay kasta, im-imbestigaranen dagiti pannakabagi ti linteg no ania ti motibo iti pammaltog ken no sino dagiti suspek a naglibas kalpasan ti pasamak.
