Patien ti Bantay Bigas a pananglimlimo kadagiti umili laeng ti plano ti Department of Agriculture a mangideklarar iti ‘food security emergency’ tapno mailaklaka ti presyo ti bagas.
Iti pannaki-uman ti Bombo Radyo Vigan ken ni Bantay Bigas Spokesperson Cathy Estavillo, agingga a maipatpatungpal latta ti Republic Act 11203 wenno ti Rice Liberalization Law ket saan a lumaka ken saan nga agtalinaed ti nalaka a presyo.
Ibilangna a ti addang ket kas met laeng kadagiti immun-una a program ti DA nga ‘Sulit Rice’, ‘Nutri Rice’ ken ‘Kadiwa Centers’ a saanna pulos nasulbar ti parikut dagiti mannalon kas kadagiti pasilidad, lumawlawa a land use converson ken land grabbing ken kaawan ti subsidiya.
Patta-pattaen ni Estavillo a kalpasan ti maysa lawas iti pannakaipatungpal ti ‘food security emergency’ ket agsublinto man met laengen ti nangina a presyo ti bagas.
Inlawlawagna nga awan ti rice shortage wenno pagkurangan iti bagas ti pagilian ta dakkel ti naangkat manipud iti sabali a pagilian.
