VIGAN CITY – Aldaw ti Domingo (July 28) ket posible nga addan ton idiay Gabur Norte, Sta. Cruz iti bangkay ni Maricar Valdez Arquiola a naggapu idiay Cyprus kas pinasingkedan ti kabsat na a ni Ricardo Arquiola Jr. iti pannaki-uman ti Bombo Radyo Vigan kenkuana.
Ni Maricar iti mapapati a maikanem a biktima ti dati a Cypriot soldier a nagbalin a serial killer iti nasao a pagilian nga idi laeng napalabas a bulan a nasarakan iti bangkay na iti uneg ti maleta a naibelleng idiay Red Lake, Mitsero kalpasan iti nakurang a makatawen a panagpukaw na manipud idi nagpakada a mapan iti ayan ti gayyem na idi Disyembre.
Segun ken ni Ricardo, binaklay iti gobyerno ti Cyprus ken ti konsulada ti Pilipinas iti nasao a pagilian dagiti amin a gastos iti pannakaiyawid ditoy probinsiya iti bangkay ti kabsat na.
Malaksid iti dayta, addan to pay iti tulong- pinansiyal nga ited iti gobiyerno ti Cyprus iti naulila nga anak ti biktima a maala nanto inton agtawen iti sangapulo ket walo.
Inton July 27, aldaw ti Sabado, a sumangpet idiay Ninoy Aquino International Airport (NAIA) iti eroplano ti maysa nga airline company a nakailuganan iti bangkay ti biktima santo maibiyahe ken maitulod iti mismo pagtaengan da idiay Barangay Gabur Norte.
