VIGAN CITY – Naisangpeten ditoy probinsia ti bangkay ti overseas filipino worker a natay idiay Saudi Arabia a ni Maribel Patubo a taga Quimmarayan, Bantay gapu iti panagsagabana ti brain aneurysm.
Idi kalman ti agsapa ket nagdisso idiay Ninoy Aquino International Airport iti eroplano a nakailuganan iti bangkay ni Maribel ket iti kamaleman na, maibiyahe kuman nga agturong idiay Laoag International Airport ngem nadelay iti flight iti eroplano ti bangkay isu nga idi laeng alas dyes iti rabii a nakasangpet idiay Laoag.
Sakbay a nakaruar iti nasao nga airport idiay Laoag ket dimmalan pay iti bangkay ni Maribel iti quarantine check a nagpaut ti tallo pulo a minutos agingga maysa nga oras sakbay a naiyawid ditoy probinsiya ket naideretso ti maysa a punerarya.
Manamnama nga ita nga aldaw ket maimasayagen idiay pagtaenganda ti bangkay ti nasao nga OFW.
