VIGAN CITY – Pinasingkedan ni Police Captain Randy Laureta iti Sta. Maria Police Station a maipagarup a nalmes wenno nayanud iti irigasyon iti kangitingitan ti kapigsa ti tudo gapu ti bagyo Egay ni Loreto De Luna Daguro Sr., agtawen iti walopulo ket uppat, retirado nga empleado ti National Irrigation Administration, agnaed iti Barangay Langaoan, Sta. Maria a nasarakan ti bangkayna iti irigasyon.
Iti pannaki-uman ti Bombo Radyo Vigan ken ni PCAPT. Laureta, alas nuebe kinse idi kalman, July 27, maysa a managan iti Mandy Paged Ramos, agtawen iti uppat a pulo ket dua, agnaed iti Barangay Mambug, Burgos ti nakakita nga adda takyag a nakaiparang iti irigasyon iti nasao a barangay a daytoy ket kinumpirmaran met ni Barangay Chairman Ellery Doquilo Daguro nga isu ti amana.
Maipalagip a July 26 idi mapukpukaw ti biktima ta idi alas singko iti agsapa ti nasao nga aldaw bayat ti kapigsa ti bagyo Egay ket napan kinita ni Barangay Captain Daguro ti amana iti karrubada tapno ikkanna koma ti kanenna ngem saannan a nasarakan isu a nagpatulong kadagiti karruba ken kabagayanna.
Maysa met kadagiti karrubada ti nakakita iti alauna iti parbangon ti July 26 nga agpagna-pagna ken agsasao a maymaysa ti biktima iti uneg ti kusinada.
Ti biktima ket agsagsagaba iti Alzheimers disease ken anxiety.
