VIGAN CITY – Nasarakan a bangkay iti kamaisan ni Jimmy Boy Pinzon, agtawen iti tallopulo ket walo, mannalon a taga-Raois, Vigan City, mapapati a biktima iti pammaltog.
Mapan koma damagen ni Rosalie Toquero, agtawen iti tallopulo ket uppat a residente iti nasao a lugar ti modules dagiti annakna idin ta nakitana a nakadasay ni Pinzon isu a tinawaganna ti putot ti biktima a ni Mark James Gonzalo Pinzon, agtawen iti sangapulo ket lima.
Iti pannaki-uman ti Bombo Radyo Vigan ken ni PLt. Col. David Dulnuan, agsibsibog ti biktima kadagiti maisna idin ta nakangngeg ni Pablito Gonzalo, agtawen iti innem a pulo ket tallo iti putok ti paltog bayat iti kaaddana iti taltalon a 500 meters iti kaadayona iti nakapasamakan ti krimen ngem saanna a ninamnama a ti manugangna ti napaltugan ta immuna nga impagarupna a palpalibang laeng ti nangngegna.
Nagsagaba ti biktima iti tama ti bala ti shotgun ti akin-kannawan a paset ti bagina a puon ti nakatayanna.
Immuna nga inatapda a naatake ti biktima idi nakadasayen iti kanal ngem idi ibangkagda ket adda dara iti bukotna ket mapapati a napaltugan.
Agim-imbestigar dagiti pannakabagi ti linteg no ania ti motibo iti napasamak.
