Maysa a bangkay ti lalaki ti nasarakan iti sangwanan ti Suying Enterprises iti Barangay VIII, Vigan City, Ilocos Sur.
Nabigbig ti bangkay a ni Reynante Jimenez Andallo, taga-Fuerte, Caoayan, Ilocos Sur.
Segun iti witness a ni Alvin Fetalvero, agtawen iti tallopulo, taga-Barangay Puro, Magsingal, rabii iti Agosto 24 idi nagiinomda iti nasao a lugar, ket iti kabigatanna, alas sais iti agsapa, nakapatpatangna pay laeng ni Andallo ta nagpakada a mapan gumatang iti kanenda.
Alas otso iti agsapa, idi agsublin, nakigtot gapu ta saanen nga agang-anges pay ti biktima.
Iti pannaki-uman ti Bombo Radyo Vigan ken ni Police Major Christopher Ramat, awan ti ania man a dunor a sinagrap ni Andallo ngem segun iti pamiliana, nakaro nga uminom iti arak, ken agsagsagaba iti diabetes.
Innayonna nga awan ti foul play iti pannakatay ni Andallo.
