VIGAN CITY – Maysa a bangkay ti lalaki iti nakita a tumtumpaw iti karayan idiay Brgy. Bungro, San Ildefonso.
Segun ti San Ildefonso Municipal Police Station, ti bangkay ket nabigbig a ni Avelino Barcena Palomares, agtawen iti limapulo ket lima, mannalon nga agnaed iti nasao a lugar.
Bayat ti panagbisikleta iti maysa a lalaki nga agtawen iti sangapulo ket dua ket nakitana ti biktima a tumtumpaw iti karayan a nakapakleb isu nga inayabanna dagiti dadduma pay nga ubbing nga agpidpidot iti bato ngem nairana nga adda ti kabsat ti biktima a ni Alfredo Bautista Palomares, agtawen iti limapulo ket innem, naasawaan nga agnaed met laeng iti nasao a lugar a mapan koma agpakan ti bakana isunga isunan ti nangguyod ti kabsatna iti karayan ngem nakitana a natayen.
Kabayatanna, naamoan a ti biktima ket masansan nga agkissiw.
