VIGAN CITY – Nasarakan a tumtumpaw ti bangkay ti saan pay nabigbig a lalaki iti Abra River, Barangay Banaoang, Bantay.
Ti bangkay ket 5’8 ti katayagna, kalalaingan ti pammagina, nakasuot iti gray Tshirt, blue a jogging pants ken blue a rubber shoes.
Nakaawat ti Bantay Police Station iti tawag manipud iti maysa a concerned citizen a mangibagbaga nga adda bangkay a nasarakan iti Abra River kangrunaan iti asideg ti baro a Quirino bridge.
Segun ken ni Hipolito Delos Santos Borje, agtawen iti limapulo ket walo, mangngalap a taga-Banaoang, Bantay, immuna a nakitana ti bangkay a simmalat iti fishnet na ket ginuyodna nga impan iti igid ti karayan.
Naideklarar a dead on the spot ti lalaki ken awan ti pagilasinan iti dunor iti bagina wenno foul play kas pinasingkedan ti nagresponde a doktor.
