VIGAN CITY – Maysa a bangkay ti babai a pinatay ti dati a nobiona ti nasarakan iti uneg ti JM Boarding House, paset iti Tamag, Vigan City.
Nabigbig ti biktima a ni Jeza Arola, agtawen iti duapulo ket lima a taga-Barangay Poblacion, Banayoyo, maysa a Radtech iti Ilocos Sur Medical Mission Hospital idinto a ti suspek ket ni Dennis Arola Raquel, agtawen iti duapulo ket pito nga agnaed iti nasao met laeng a lugar.
Segun ken ni PLt. Col. Franklin Ortiz, OIC-COP iti Vigan Police Station, personal nga impakaammo kadakuada ti kabsat ti suspek iti panangpapatayna ti dati a nobiana.
Mapatta-patta nga alas singko agingga alas syete iti bigat ket napan ti suspek iti kasera ti nobiana tapno simpaen ti relasyonda agingga idi saandan nga agkinnaawatan.
Saan a nateppelan ti suspek ti bagina isu a nabekkelna ti nobiana babaen ti charger cord.
Naitaray iti ospital ti biktima ngem naideklarar a dead on arrival.
Nupay kasta, iggemen dagiti pannakabagi ti linteg ti suspek tapno maidalan iti husto a proseso kagiddan ti panagimbestigarda iti napasamak.
