VIGAN CITY – Nasarakan iti karayan ti bangkay ni John Paul Barcena Sabluden, agtawen iti sangapulo ket siam, estudiante iti University of Ilocos Philippines, agnaed iti Baranagay San Elias, Sigay.
Ti pannakasarak ti bangkay ket babaen ti panagtitinnulong dagiti Sigay community volunteer, Sigay Police Station, Bureau of Fire Protection, Barangay ken Municipal Disaster Risk Reduction and Management Council – Sigay.
Iti pannaki-uman ti Bombo Radyo Vigan ken ni Police Captain Godofredo Ribuyaco, hepe ti Suyo Municipal Police Station, mapapati a limmasat iti steel way ti karayan a mapan Sigay ni Sabluden bayat a nakamotorsiklo idi naiyanud gapu iti kinapigsa ti ayus iti danum.
Segun ken ni Ribuyaco, nakitada laengen a naisalat iti bato ti bangkay idi bimmaba ti danum idinto a nakita iti dadduma a paset ti motorsiklo iti nasao met laeng a karayan.
Immuna a naireport a mapukpukaw ni Sabluden babaen ti ikitna a ni Joan Padsing Bandiwan.
Naudi a nakita ni Sabluden iti alas nuebe iti rabii ti July 25.
Segun ken ni Bandiwan, pimmanaw ti kaanakanna babaen ti inusarna a motorsiklo agingga a saanen a nagawid iti pagtaenganda.
