VIGAN CITY – Agtultuloy ti imbestigasyon ti Santa Police Station iti pannakasarak manipud iti kabaybayan ti Magsaysay, Santa ti bangkay ni Romy Terenal, agtawen iti uppat a pulo ket dua, agnaed iti Barangay Banyacao, Bangued, Abra.
Iti pannaki-uman ti Bombo Radyo Vigan ken ni PCAPT. MARK BRYAN CORPUZ, immunan a naireport a mapukpukaw ni Terenal sipud idi July 28.
Basar iti report a dimmanun iti kapulisan, naudi a nakita ti biktima a nakasuot iti life vest.
Kabayatanna, balligi ti pannakaibangkag ti nasao a bangkay babaen ti panagtitinnulong dagiti kameng ti Philippine Coast Guard kas pinasingkedan ni Municipal Disaster Risk Reduction and Management Officer Vince Cardenas.
Innayonda a dagus ti panagresponde iti kamengda idi naawatda ti report manipud idi maipakaammo kadakuada nga adda ti bangkay a tumtumpaw iti nasao a kabaybayan.
Maipagarup a nabiit pay ti pannakatay ti nasarakan a lalaki ta saan pay laeng nga agruprupsa.