VIGAN CITY – Maysa a bangkay ti maladaga ti nasarakan iti igid ti kabaybayan idiay Brgy Darapidap, Candon.
Iti pannaki-uman ti Bombo Radyo Vgan ken ni PLTCOL Jessie Balinang, COP ti Candon City Police Station, magmagna idi ni Jimmy Ramierz, agtawen iti limapulo ket lima nga agnaed iti nasao a lugar idi napansinna ti maladaga nga adda plasticna iti abay na a mapapati nga isu iti naaramat a panangabbung iti ubbing.
Sigodna met nga inpakammo kadagiti barangay officials ti nakitada nga ubing.
Segun ken ni Gilbert Galima, agtawen iti uppat a pulo, city guard ti Darapidap foodcourt, idi rabii ti March 21 ket adda napansinna a dua a babbai nga agiinom iti igid ti baybay isu a napanna sinitar ken pinagawidna pay dagitoy ta rabiin.
Alas dyes kuarenta idin iti rabii idi pimmanaw dagiti dua a babbai iti lugar.
Agtultuloy iti panangbirok dagiti otoridad kadagiti CCTV footage a mabalin a makatulong iti imbestigasyon para iti dardaras a pannakabigbig kadagiti nangibati iti maladaga ken makikamkammayetdan kadagiti opisyal ti barangay para iti panangberipika kadagiti rekord ti masikog iti lugar.
