VIGAN CITY – Burburtiya pay laeng kadagiti agindeg idiay Barangay Bongtolan, Vigan City ken uray dagiti pannakabagi ti linteg nu siasino dagiti dua a lallaki a napan nangikali iti bangkay ti maladaga a lalaki iti bakante a lote iti nasao a lugar.
Pinagtitinnulungan dagiti agindeg idiay Barangay Bongtolan nga inyaramidan iti lungon ti ubing a pinanaganan da ti Baby Angelo sa da inmasayag iti bangkay na iti uneg ti kapilya ti barangay.
Ti bado ti ubing ket ginatang iti maysa kadagiti putot iti dati a barangay kapitan ti Barangay Bongtolan.
Ti bangkay ket nasarakan iti caretaker iti bakante a lote idi nadlaw na nga adda iti agsubli-subli a kotse iti lugar da ken adda ti nakita na a dua a lallaki a nakabitbit ti karton a dimsaag iti lugan.
Idi napan kinita ti caretaker nu anya ti nagyan ti karton nga inbati dagiti dua a saan pay nabigbig a lallaki, nadlaw na nga adda kasla nakali a paset iti lote.
Idi kinali ti caretaker iti daga nga asideg ti karton, nakita nan ti bangkay ti maladaga a lalaki su nga insigida nga inpakaammo na kadagiti opisyal iti barangay.
