VIGAN CITY – Nasarakan a tumtumpaw iti bangkay ni Mariano Tipon a taga- Sto. Domingo a nakabado ti puraw, nakamaong pants ken nakajacket idiay Abra River a sakop ti Sallacong, Bantay ken Palang, San Quintin, Abra.
Maibasar iti imbestigasyon dagiti otoridad, awan iti nakitada a foul play iti pannakatay ti biktima ta awan iti nakitada a dunor na.
Adda iti nangipakaammo ken ni Barangay Kagawad Jimmy Tinaya ti Barangay San Mariano, Bantay nga adda iti nakita da a bangkay isu a napan da iti lugar nga inbaga da a nakakitaan da.
Idi napan da iti lugar a nakakitaan ti bangkay, adda dagiti agindeg iti nasao a lugar a nagkuna a nakita da ti biktima idi naminsan nga aldaw nga agin-indayon iti sirok ti maysa a kayo ken magmagna iti nasao a lugar a kasla nakainom.
Ti biktima ket mapapati nga adda problema iti panagpanpanunut na.
