VIGAN CITY – Nasarakan a natay ti maysa a lalaki gapu iti pannakatinnagna iti karayan bayat iti panagmotorsiklona idiay Sitio Baudan, Brgy. Apaya, Alilem.
Iti pannaki-uman ti Bombo Radyo Vigan ken ni PLt. Rovic Nelmida, OIC iti Alilem Municipal Police Station, idi June 19, 2021 iti oras ti alas sais y media iti rabii ket agawiden ti biktima a ni Jimmy Bie, agtawen ti limapulo, naasawaan, construction worker nga agnaed idiay Brgy. Anaao, Alilem kaduana ni Larry Cabatu Doliente a katrabahoan ken nakainomanna a taga-Sitio Nalvo, Brgy. Kayapa, Bakun, Benguet idin nadadaelan ti motorsiklo ni Doliente isu nga immuna a simmalog ti biktima.
Segun ken ni Nelmida, idi nakadanon ni Doliente iti alas otso iti rabii iti pagtaengan ti biktima ket naamwanna a saan pay laeng gayam a nakaawid ti biktima isu a nagsapulen ti pamiliana.
Kinabigatanna ket nasarakan ti bangkay ni Bie iti karayan a nakita da Jommel Ferrer ken Marvin Meneses a nagsagaba iti head injury a gappuanan iti pannakatayna gapu iti pannakatinnagna iti karayan nga adda kangatona a nasurok kumurang tallo agingga lima a metro.
