VIGAN CITY – Saanen nga ipa-autopsy dagiti kameng ti pamilia ti biktima a ni Mariano Tipon a taga- San Pablo, Sto. Domingo agsipud ta patienda nga awan iti foul play ti pannakatayna.
Ti bangkay ti biktima ket nasarakan a tumtumpaw iti karayan idiay Brgy. Palang, San Quintin, Abra idi naminsan nga aldaw.
Ti pannaki-uman ti Bombo Radyo Vigan ken ni Police Executive Master Sergeant Ferdinand Garcia ti San Quintin Municipal Police Station, awan iti aniaman a pangilasinan a nakitada iti bagi ti biktima a mabalin koma nga isu ti aramatenda a lead tapno maduktalan no ania iti pudno nga impatayna.
Patien ni Garcia a naturog idiay karayan ti biktima ken posible a saanna a naibturan iti lamiis iti nasao a lugar wenno posible a nastroke ta mapapati pay a nabartek iti laksid nga ibaga dagiti kameng ti pamilya na a saan a sumimsimsim iti arak.
