VIGAN CITY – Agingga itatta ket saan pay laeng a nabigbig nu siasino ti nasarakan a bangkay ti lalaki a mapapati a nagbekkel idiay Gabur Sur, Sta. Cruz.
Segun ken ni Police Captain Macario Doloaoan, hepe ti Sta Cruz municipal police station, manipud idi naiwaragawag iti pannakakita ni Nelia Lizardo Valencia nga agtawen iti lima pulo ket uppat, iti nasao a bangkay iti asideg ti daldalusan na a farm, adun dagiti napan nangkitkita a tattao nangruna dagiti adda ti mapukpukaw a kameng ti pamilya na ngem awan pay iti nakabigbig ken ti biktima.
Malaksid iti maong a pantalon a suot ti biktima a nakabitin iti poon ti aludig ket ti laengen tattoo na iti akin-kannawan nga ima ken abaga na, pakairamanan iti saanen unay a malasin a mapapati a tattoo iti bukot na iti pagilasinan kenkuana.
Idi nasarakan ni Valencia ti nasao a bangkay ket agruprupsan isu a mapapati a nabayagen a nakabitin iti nasao a poon iti kayo.
