VIGAN CITY – Saan nga impagarup ni Alfreda Arola, ina ti biktima ni Jeza manipud iti Barangay Naguimba, Banayoyo a mapasamak ti pannakapapatay ti anakna ta sakbay ti dayta ket nakapagpapatangda pay idiay Banayoyo Police Station.
Iti pannaki-uman ti Bombo Radyo Vigan iti ina ti biktima, nagawid idi aldaw ti Sabado ti anakna ket impudnona kenkuana a dinangran ti dati a nobiona a ni Denis Raquel.
Kas maysa nga ina ket naalarma ni Arola iti pasamak isu a nagturongda iti kapulisan ket iniyabanda ti dati a nobio ti anakna.
Nasyaat met ti nagbanagan ti saritaanda isu a pinalubosanna a nagsubli iti trabaho ti anakna iti aldaw ti Lunes ta natalek a saan a makaaramid iti dakes ti suspek.
Innayon ti ina ti biktima a sisasagana a mangpakawan iti suspek ngem masapulna latta met nga ikaro ti nagbasulanna.
Maipalagip a ti biktima ket binekkel ti dati a nobiona babaen ti charger cord ken nasarakan laengen a bangkay iti uneg ti kaserana.
Nupay kasta, immannugot met ti pamilia-Arola a maidalan iti autopsy ti bangkay ti biktima.