VIGAN CITY – Addan iti patta-patta wennu mapanpanunut ti Pamilya Momay a posible a rason nu apay nga agingga itatta ket saan da pay laeng a nakita iti bangkay ni Reynaldo Momay, ti photojournalist nga isu iti maika-lima pulo ket walo a biktima ti Maguindanao Massacre a napasamak idi November 23, 2009.
Ti pannaki-uman ti Bombo Radyo Vigan ken ni Maria Reynafe Momay- Castillo, ti kakaisuna a putot ni Reynaldo a maysa a nurse nga adda idiay Minnesota, US, atapen na nga adda iti nangala iti bangkay ti ama na gapu laeng ti sangagasut a ribo a pisos a danyos iti kada biktima nga inparuwar idi ti gobiyerno.
Maburburtiyaan da nu apay a kadagiti amin a biktima iti nakaam-ames a krimen ket ni laeng tatang na iti mapukpukaw ken saan da a nakita iti bangkay na iti laksid a nakita da iti pustiso ken dadduma pay nga alikamen ken bado na iti lugar a nakapasamakan iti krimen.
Malaksid iti dayta, mapanpanunut na pay a posible a saan nga usto iti pannakakali dagiti bangkat ket nabati iti massacre site iti bangkay ti ama na.
Nu pay naibasura dagiti kaso nga inpila da inaig iti napasamak ti ama na, inkari ni Castillo nga itultuloy na iti agsapul iti pamuspusan tapnu magun-od na iti hustisya para ti ama na.
