Naiyakar manen ti nakaituding a panag-imprenta ti official ballot a maaramat inton national ken local elections inton Mayo.
Iti pakaammo ti Commission on Elections, ti rumbeng a pannakaituloy ti ballot printing ket ita nga aldaw ngem naiyakar inton January 27.
Ti addang ket gapu iti panagsanud ni senatorial candidate Francis Leo Marcos.
Segun ken ni Comelec, ni Marcos ket karaman iti naikkan ti temporary restraining order iti Korte Suprema a manglaplapped iti pangngeddeng ti komisyon nga ideklarar a nuisance candidate iti Commission en banc.
Ngem personal a nagturong ni Marcos iti Comelec tapno agipila iti sworn statement of withdrawal of certificate of candidacy iti Comelec Law Department.
Malaksid a naisanud iti ballot printing ket nakanselar pay ti panag-upload ti ballot faces iti official website-da idi Enero 23, 2025.
