VIGAN CITY – Agduduma nga emosyon ti narikna ti maysa a board passer iti Teacher’s Licensure Examination agsipud ta arigna narigat a patien ken maragsakan gapu ta kalpasan ti namin-dua a daras a pannakapaayna idi kallabes ket napagballigiannan ti maikatlo a panangpadasna.
Segun ken ni Princess Jennebie Abella, numan pay nagdudua idi damo ken “failure” ti panagkitana iti bagina gapu ti saanna a pannakaipasa ket namayat met laeng ti nagresultaan ti rigrigatna babaen ti tulong ti pamilia ken gayyemna a nangal-allukoy kenkuana a mangpadas latta nga ag-exam.
Narigat para kenkuana ti preparasyon ta iti kanayon a pannakaisanud ti exam ket saan unay a makapokus ken dakkel a karit ti panagpositibona pay idi iti Covid19 ta impagarupna nga amangan idi a saan a maka-exam.
Isagutna ti balligina iti pamiliana kangrunaan ti amana a nang-motivate kenkuana, ket inton malpas ti oath taking-da ket planona ti sumrek pay laeng iti pribado a pagadalan sakbay nga ag-apply iti Department of Education.
Nupay kasta, binalakadanna dagiti agar-arapaap met a makapasa a saanda a maawanan iti namnama, agtalekda iti kabaelanda, ag-review, ken saanda a lipaten ti Dios.
