Saan a bagsak a grado no di ket ‘incomplete’ (INC) ti naited a remarks iti maysa nga estudiante a nangpaltog iti mangisursuro idiay Balabagan Trade School iti Lanao del Sur.
Ti biktima ket ni Danilo Barba, agtawen iti tallopulo ket uppat idinto a ti biktima ket maysa a Grade 11 student nga agtawen iti duapulo.
Iti pannaki-uman ti Bombo Radyo Vigan ken ni PLT. Albert Alarde iti Balabagan Municipal Police Station, mabalin nga iti kinaubing ti suspek ket madi ti nagawatanna no ania man ti naibaga kenkuana ti mangisursuro isu a naaramidna ti pimmatay.
Maibasar iti imbestigasyon, saan laeng a ni Barba ti nangted iti suspek iti nadakamat a remarks ta adda pay dadduma a mangisursuro a nangibagsak kenkuana.
Inlawlawag ni Alarde a ti pasamak ket maibilang nga isolated case ta ti Balabagan ket natalna ken nalaing nga agkaykaysa dagiti agindeg.
Maipalagip a ti biktima ket sumrek iti campus idiay Barangay Narra idin pinaltugan ti suspek babaen iti caliber 45 a binulodna.
Kalpasan ti panaglemlemmeng ti suspek iti ili ti Marogong, insuko daytoy ti kabsatna a pulis a naidestino iti Lanao del Sur nga isu ti timmultulong iti naiwayat a hot pursuit operation.
Maidalan met iti ballistic examination ti naaramat a paltog tapno matakuatan no asino ti mabalin a nakinkukua.
