Pakabuklan a PhP389 million ti baknang ni Presidente Ferdinand R. Marcos Jr. kas maitunos iti nairuar nga Statement of Assets, Liabilities, and Net Worth wenno SALN-na manipud pay idi Disyembre 31, 2024.
Nairaman pay iti SALN-na ti appraisal ti maysa a pribado a firm, ti Cuervo Appraiser Inc., a nangikabil iti net worth-na iti PhP1.375 billion, mangipakita a ti PhP389.57 million ket maitunos iti standard ti Civil Service Commission (CSC) iti panangipasa ti SALN, idinto a ti PhP1.375 billion ket maitunos iti gatad manipud iti appraisal ti Cuervo.
Karaman ti assets ti presidente a PhP142.026 million ti 21 a real estate properties pakairamanan ti agricultural ken residential lands ken ti personal a sanikua nga aggatad ti PhP247.332 million.
Sumagmamano kadagiti personal asset ni Marcos ket cash a PhP38.7 million, investments a PhP134.192 million, ken dagiti alahas, 12 a lugan ken painting nga aggatad iti PhP247.332 million.
Sumagmamano kadagiti luganna ket ti Mercedez-Benz Maybach nga aggatad iti PhP10.5 million, ken 126 a painting manipud kadagiti nalatak nga artista a ti kanginaan ket PhP19 million.
Saan nga indeklarar ti presidente ti aniaman a liabilities manipud iti 2024 SALN-na ken dagiti SALN-na manipud Hunyo 2022. Augie Arellano
