VIGAN CITY- “Nangasawaak met la koma idi, ken nagfamilia tapno addda katakunaynayko, ken mangkita kaniak ita” mabalin a dayta iti sentimiento ni Fidela Ubasco, agtawen iti 90, agnaed idiay Pagsanaan Sur, Magsingal Ilocos Sur.
Agmaymaysa nga agbibiag iti awan koryentena a pagtaengan ket ti la bassit pensionna iti pangal-alanna iti pagbiagna, malaksid nga masaksakit payen.
Segun iti baket flashlight laeng iti us-usarenna iti rabii, nagkiddaw iti tulong Barangayda uray maysa laeng koma a bulb iti maipaay ngem awan agingga ita.
Agsipud ta saannan a kabaelan iti agbiag a maymaysa, kalikagumannan iti mapan iti Balay Taripato(pagtaraknan kadagiti nabay-bay-an a nataengan).
Inkari ni Barangay Captain Ferdinand Lira a tumulong ti barangay tapnon maawat iti Balay Taripato, ngem segun iti Social Welfare Officer iti ili a Magsingal a ni Shirley Tiri, kasapulan pay nga ammuenda no pudno nga awan kabagyanna a mayat a mangaywan kenkuana, sakbay a desisyonenda nga isalinong iti Balay Taripato.
