VIGAN CITY – Dead on arrival ni Nora Ricardo Agusen, agtawen iti innem a pulo ket innem ta binagkong ti asawana a ni Alfredo Paliko Agusen, agtawen iti pitopulo ket maysa idiay Sitio Caniogan, Barangay Tiagan, San Emilio.
Nakaawat dagiti pannakabagi ti linteg iti tawag manipud iti maysa a concerned citizen a mangipakpakaammo iti napasamak a pammagkong iti lugarda.
Dagus a rinespondean dagiti pannakabagi ti linteg ti pasamak ket idi makadanunda, insuko ni Barangay Captain Jesus Matthew Foronda ti suspek a mapapati a nangbagkong iti asawana.
Iti pakpakauna nga imbestigasyon, nakita ti suspek ti asawana a nakaiggem iti bag a pumanaw isu a sinaludsod ti suspek no papananna nga isu met ti puon ti ririda iti biktima ket binagkongna iti paset ti susona.
Natakuatan nga adda ti nabayag a saan a pagkinkinnaawatan ti biktima ken suspek nga agassawa nga isu ti rason ti panangisina ti biktima iti asawana.
Naala iti nakapasamakan ti krimen ti kutsilyo a duapulo ket walo a centimetro ti kaatiddugna.
