VIGAN CITY – Kritikal ti maysa a baket ta nadungpar idi kalman idiay Barangay Don Lorenzo, Caoayan a bimmallasiw iti kalsada.
Nabigbig ti biktima a ni Arcenia Querubin, agtawen ti pito pulo ket uppat, naasawaan, awanan trabaho nga agnaed iti nasao a lugar idinto a ti nakadungpar kenkuana ket ni Kenneth Reiner Quilonio nga agtawen dua a pulo ket uppat a nakamotor nga agnaed idiay Don Alejandro Quirolgico, Caoayan.
Maibasar iti imbestigasyon dagiti otoridad, agtaktakder iti akin-daya a paset iti kalsada ni Querubin idinto nga agpaabagatan a direksyon ni Quilonio idi bimmallasiw ti biktima a puon iti pannakadungparna ken nagsagabaanna iti dunor iti ulona.
Ti agdama, agtaltalinaed idiay Ilocos Sur Provincial Hospital Gabriela Silang ni Querubin para iti pannakatamingna.
