VIGAN CITY – Nagyaman ni Governor Ryan Singson iti suporta dagiti taga-Ilocos Sur iti agtultuloy a panangrambak iti Kannawidan Festival 2022 ditoy probinsia kagiddan ti panangawisna nga agbuya dagiti umili iti umuna a Bakbakan sa Ilocos Sur a maisaysayangkat idiay Elorde Boxing Gym, Bantay.
Iti pannaki-uman ti Bombo Radyo Vigan ken ni Singson, umuna a gundaway nga adda maaramid a laban iti boxing, muay thai, ken mixed martial arts a pakipasetan dagiti amateur ken pro-fighter.
Saan a narigatan dagiti organizer a nagsapul kadagiti participant ta adu ti nagrehistro manipud iti probinsia, Manila ken Baguio.
Nupay kasta, balligi ti pannakayuswat ti event babaen ti panagkikinnammayet ti Ilocos Sur provincial government ken ti Games and Amusement Board a nagyamanan met laeng ti gobernador.
Manamnama a tinawenton ti pannakaangay ti nasao nga event ta kayat ti gobernador ket ma-develop dagiti adda iti grass roots level tapno addanto met ti mabigbig a boksingero ti Ilocos Sur.
