Back-to-back win para ken ni Carlitos Joe Corrales manipud iti ili ti Narvacan, Ilocos Sur ta nadepensaranna ti panagbalinna a gold medalist iti Boys’ Singles Badmiton Tournament (Elementary Level) iti 2025 Palarong Pambansa.
Iti pannaki-uman ti Bombo Radyo Vigan ken ni Corrales, saanna a namnamaen ti panagkampeonna manen gapu iti sagsagabaenna nga injury iti saka.
Ngem babaen iti disiplina iti bagi ken panagkararag ket inabakna ti kalaban a ni Lemmon Dean Parone ti Region IV-B iti championship match.
Saan a nagpakampante iti bagina ngem gapu ta ammonan ti garaw ti kalaban ket nagpokus ket inyaleng-alengna ti marikriknana a sakit ti injury-na.
Balakadna kadagiti agar-arapaap met nga agbalin a kas kenkuana nga agkararag, dumngeg iti coach, agensayo ken disiplinaan ti bagi.
Kabayatanna, proud ken maragsakan ni Sharmaine Corrales iti nagun-odan ti anakna numan pay sakbay ti laban ket madanaganda gapu iti sagsagabaen nga injury ti player.
Uray no kasta ket addada latta met a nangsupsuporta kenkuana kabayatan iti labanna.
