VIGAN CITY – Kritikal ti maysa a backrider ti motorsiklo gapu iti aksidente iti Quirino Boulevard, Barangay Tamag, Vigan City.
Ti Mio a motorsiklo ket minaneho ni Brent Alimboyuguen Laurente, agtawen iti sangapulo ket siam, taga-Barangay Raois, Vigan City.
Ti met backride ket ni Chenzhen Kate Callo Martinez, agtawen iti duapulo ket dua, taga-Barangay Banglayan, Narvacan.
Nagturong ni Erlinda Collo Martinez, agtawen iti limapulo ket siam, ina ni Chenzen iti Vigan City Police Station tapno ipakaammo a ti anakna ket naiconfine iti Ilocos Sur Provincial Hospital ta awan pay laeng puotna.
Maipalagip a ti motorsiklo ket agpapa-abagatan idin ta nadungparda ti agwarang-warang nga aso a nagballasiw a puon ti pannakasagrapda iti dunor.
Naipaagas ti drayber ken pasahero iti Ilocos Sur Provincial Hospital-Gabriela Silang.
Saan koman a kayat ti ina ti karaman iti aksidente a maireport ti pasamak ngem gapu iti kritikal a kasasaad ti anakna, ket nagdesisyon nga ireportna para iti pannakaipila ti reklamo kontra iti drayber ken ti akinkukua iti aso.
