VIGAN CITY – Sumangpet inton bigat dagiti sangapulo ket maysa nga opisial manipud iti Department of Agriculture, Bureau of Animal Industry ken Regional Office nga idaulwan ni Dr. Nestor Domenden iti siudad ti Vigan a mangala iti blood sample dagiti baboy kadagiti adda iti uneg ti 500-meter radius zone manipud iti nakairekordan ti kaso ti African Swine Fever iti Pantay Fatima.
Iti pannaki-uman ti Bombo Radyo Vigan ken ni Provincial Board Member Efren Rafanan, dagiti baboy nga agpositibo iti ASF ket matuloy a maidalan iti culling operation ngem no negatibo ket mailasin a mailako wenno maparti uray pay no addada iti ground zero tapno saan a mapaay dagiti hog raiser.
Malaksid ti dayta, adda ti defogging machine a maipatulod para kadagiti kontaminado a lugar iti virus a mangisayangkat iti biosecurity surveillance.
Kabayatanna, inlawlawag ti opisial a dagiti baboy nga aggapu iti 2nd District a maipan iti 1st District ket saan a maiparit idinto a no aggapu iti 1st District a maipan iti 2nd District wenno rumuar iti probinsia ket masapul iti certificate of inspection ken certificate nga aggapu iti Barangay Captain a saan a dagiti baboy ket saan nga iligal a naipastrek.
