VIGAN CITY – Nainget nga im-imbestigaran ti Vigan City police station iti napasamak a panagtakawan idiay Escolta Home Lodge, Crisologo St. Barangay 2, Vigan City a nakairamanan ti suspek a nagpabigbig ti nagan a Merly Gajol nga agtawen ti lima pulo ket walo, aglaklako ti prutas ken agnaed idiay 53 Maginhawa St. FB Harison, Pasay City ta mapapati a ginandat na a takawen ti cellphone ni Jennifer Amarillo nga agtawen ti dua pulo ket maysa nga agnaed idiay Brgy. Bayubay Sur, San Vicente ngem nasiputan da isu a nakemmeg.
Segun ken ni Police Corporal Mark Lee Altares, imbestigador ti Vigan City PNP, nabati ti biktima ti cellphone na iti desk ti nasao a lodge idi innala ti suspek ngem adda ti maysa a nakasiput iti in-inut a panangikabil na iti bag na.
Sinurot ti nakasiput kenkuana iti nagturungan na ket nagpatulong kadagiti pannakabagi ti linteg a poon ti nakakemmegan ti suspek.
Saan a masigurado nu ti nadakamat ti suspek a nagan na ket isu iti pudno a nagan na agsipud ta awan iti naiparang na nga ID kadagiti nagimbestigar a pannakabagi ti linteg.
Kabayatanna, nadakamat ti suspek a ginandat na a takawen ti cellphone ti biktima ta agkurang iti pagplete na nga agawid ta naggapu idiay Laoag ta mapan na kuma sarungkaran ti gayyem na ngem saan na a nadanun ta awan iti pinang-contact na kenkuana ta awan iti cellphone na.
