Maysa nga agtawen-iti-sangapulo ket siam a babai ti nakemmeg gapu iti panagtakawna iti maysa a pagtaengan idiay Barangay Cadacad, Burgos, Ilocos Sur.
Ti suspek ket ni May Galera Astudillo, taga-Caupasan, Danglas, Abra idinto a ti biktima ket ni Roger Filar Degracia, agtawen iti innem a pulo, engineer a taga-Barangay Cadacad, Burgos.
Kabayatanna, ti witness ket ni Jeffrey Arreola Cabus, agtawen iti uppat a pulo ket tallo, Daycare teacher, agnaed iti Barangay Cadacad, Burgos.
Nakita ti nakalugan iti motorsiklo a ni Cabus ti suspek a simrek iti pagtaengan ti biktima ket palimed a pinalpaliiwna agingga a nakitana a simrek ti suspek iti maysa a kuarto.
Bayat ti kaadda ti suspek iti kuarto, tinawaganna da Jeric Christian Dasalla ken ni Marc Lei Arreola.
Idi rimuar ti suspek, tinengngel dagiti tallo ket tinawaganda ti akinbalay ket binigbigna met ti sling bag-na a naglaon iti PHP92,000 nga iggem ti suspek.
Nupay kasta, sangwen ti suspek ti kaso a theft.
