Maysa nga agtawen iti duapulo a babai a taga-Sto. Domingo, Ilocos Sur ti natay gapu iti mapapati a panagbekkelna.
Limmabas iti babuyan ti maysa a senior citizen iti kakaykaywan a paset a kukua ti maysa nga agtawen iti limapulo ket walo idin ta nakitana ti nakabitin a biktima nga awan ti biagna iti sanga ti kayo ti mangga.
Gapu dayta, pinakaamoanna ti guardian ti biktima ket tinurongda ti lugar a nasurok kumurang 300 meters ti kaadayona iti pagtaenganda.
Dagiti met kameng ti Bureau of Fire Protection ken Rural Health Unit ti nasao nga ili ti nangwarwar iti tali nga inaramat a pinagbekkel ti biktima.
Naitaray iti ospital ngem naideklarar a dead on arrival.
Manarimaan pay laeng ti panagimbestigar dagiti pannakabagi ti linteg no apay a nagbekkel ti biktima.
