VIGAN CITY – Maysa a babai nga agtawen ti lima pulo iti natulongan dagiti kameng ti Santa Municipal Police Station, Santa Municipal Social Welfare and Development Office ken Santa LGU a makaawid idiay Mt. Banaho Novahills Village, Bagumbong, Caloocan City.
Nabigbig ti babai a ni Abegail Gajo Vergara agtawen ti lima pulo a naireport idi June 5 babaen kadagiti umili nga agididda ti waiting sched idiay Brgy. Marcos District.
Segun ti Santa Municipal Police Station, insigidada a nagtignay ket inimbitaranda ni Vergara ti police station tapno ammuen no ania iti napasamak kenkuana ket nammuanda a dua a bulanna a nagnagna sakbay a nakadanun iti nasao nga ili ken naammuan nga adda ti tallo nga annakna a da Danica, Velley ken Anna Marie.
Nagaramid nga insigida iti pamuspusan ti Santa PNP tapno makauman ti pamilya ti Vergara ket babaen ti social media nakapatangda ti maysa kadagiti annakna a ni Danica Gajo Vergara ket kinunana nga agsagsagaba ti inana ti dementia sakit a pannakawan iti panunut wenno panaglilipat ken saan laeng nga iso iti umuna a gundaway a naglibas kadakuada.
Kiniddaw ni Danica nga agtalinaed palaeng ti inana ti PNP station kabayan nga agkiddawda iti tulong iti local a gobierno ti Caloocan City ket pinatgan met ti PNP.
Nakikinnammayet dagiti kapulisan ti opisina ni MSWD Officer Genevieve Balbuena nga insigida a nagaramid ti aksyon ken naipakammu ti LGU Santa babaen iti panangidaulo ni Mayor Jesus Popoy Bueno Jr ket idi June 15 ituloddan ni Vergara idiay Caloocan ken naipaayan pay ti financial assistance manipod LGU.
