VIGAN CITY – Dead on arrival iti ospital ti maysa a babai ta napaltogan bayat nga agtugtugaw iti motorsiklona iti sangwanan ti Bangued, West Central School idiay Barangay Zone 3, Bangued, Abra.
Ti biktima ket ni Catherine Andallo Aguilar, agtawen iti tallopulo ket walo, balasang, hog raiser nga agnaed idiay Barangay Quilliat, Langiden, Abra
Segun ti Abra Police Provincial Office, agtugtugaw ti biktima iti motorsiklona idin dimteng dagiti dua a lalaki a nagkalugan ti nangist ken nalabbaga a Honda TMX Supremo 150 motorcycle ket pinaltoganda iti namindua a daras iti ulo ti biktima sada naglibas.
Insayangkat ti Intel operatives ti hot pursuit operations para ti posible a pannakakemmeg dagiti suspek ken napakaammoan dagiti kaasideg a Municipal Police Stations a mangisayangkat ti dragnet operations kontra kadagiti nakalibas a suspek idinto a naipan ti biktima iti Abra Provincial Hospital ngem naideklarar a dead on arrival babaen ti attending physician-na.
Narekubre ti dua a fired cartidges iti calber .45 ken maysa a deformed slug iti nakapasamakan iti krimen.
Nupay kasta ket nasaedan dagiti pannakabagi ti linteg iti Tayum Municipal Police Station ti motorcycle-riding suspects iti naisayangkat a checkpoint iti sangwanan ti maysa a gasoline station idiay Barangay Patucannay, Tayum, Abra a nakakemmegan ti gunman a ni Joemar Britanico Bayle idinto a nakalibas ti nagmaneho.
Naala manipod ti gunman ti maysa a backpack a naglaon ti maysa a cal .45 pistol nga adda magazine na ken nakaipan a lima a live ammunition, nangisit a wallet a naglaon ti agduduma nga IDs ken pictures, black sunglasses, black wrist watch, maysa a SY power motorcycle battey, maysa a gray belt bag a naglaon ti rosary, lighter, kwentas ken kuarta a P42.
Kabayatanna, nasaedan met laeng dagiti pannakabagi ti linteg iti Bangued Municipal Police Station idiay Barangay Lingtan, Bangued, Abra ti driver a ni Dennis Viado Britanico, agtawen iti duapulo ket maysa, baro nga agnaed idiay Quilliat, Langiden, Abra a gappuanan ti pannakakemmegna.
Agpada nga addan iti kustodiya iti Bangued Municipal Police Station dagiti suspek karamanen dagiti naala nga ebidensya kadakuada para ti documentation sakbay ti pannakaipila ti kaso kontra kadakuada.
