Nakaruaren iti ospital ti babai a tinagbat ti asawana iti siudad ti Candon gapu iti mapapati nga imon.
Iti pannaki-uman ti Bombo Radyo Vigan ken ni PLT. Jovelyn Antalan iti Candon City Police Station, addan iti Bureau of Jail Management and Penology iti siudad ti suspek a napilaanen iti kaso a panaglabsing iti Republic Act 9262 wenno Violence Against Women and their Children Act.
Maibasar iti imbestigasyon ti kapulisan, nagbakasyon ditoy pagilian ti biktima manipud ballasiw taaw ket mapapati a nagimon ti asawana.
Dayta ket gapu ta nakabasa ti suspek iti conversation iti cellphone ti asawana.
Kinompronta ti suspek ti biktima ket rimsua ti riri iti nagbaetanda isu nga inanawa ida ti anakda.
Idi nagsubli ti anakda kalpasan ti panangkitana kadagiti kabsatna, nakitana ti amada a mangtagtagbat iti inana.
Nagsagaba iti dunor iti ulo ken ima ti biktima a naipaagas iti ospital.
