VIGAN CITY – Nakemmeg ti maysa a babai a nanggandat nga agilibas ken agtakaw iti uneg ti maysa a mall idiay Brgy. San Nicolas, Candon City.
Segun kenni Police Corporal Maximilian Calibuso, imbestigador ti Candon City Police Station, nakita ti security guard iti nasao a mall ti suspek a ni Angel Angeles nga agtawen ti sangapulo ket walo nga agnaed idiay Brgy. Balili, La Trinidad, Benguet a nakaiggem iti nalabaga a shoulder bag.
Idi kinita iti security guard iti bag ti suspek, nakita na dagiti naduma-duma a lupot nga aggatad ti sumurok- kumurang a sangapulo ket tallo a ribo a pisos ket sinaludsod ti security guard nu ayan ti resibo dagiti nasao a lupot ngem awan iti naipakita ti suspek isu nga inpan da iti police station.
Nadakamat ni Calibuso nga awan iti record kadakuada ti suspek inaig iti sabali nga insidente iti panagtakawan a nakairamanan na ta isu pay laeng iti umuna a gundaway a pannakaireklamo ti suspek.
