VIGAN CITY – Im-imbestigaran dagiti kameng ti Bureau of Fire Protection iti ili ti Bantay no ania ti nagtaudan ti uram idiay Bulag East a nakatayan ti maysa a baket ken nakadunoran ti asawana.
Nabigbig ti biktima a ni Sixta Ragasa, agtawen ti walopulo ket dua ken ti asawana a ni Maurino Bautista, agtawen ti walopulo ket maysa a nagsagaba iti first degree burn ti akin-kannawan a luppona.
Segun ken ni SFO 1 Reymart Tolio, kandela ti us-usaren dagiti biktima iti uneg ti pagtaenganda nga isu ti maysa a kitkitaenda a rason a nagtaudan ti uram ken naaramid laeng iti light materials ti pagnanaedanda isu a napaspas iti panagkayamkam ti apuy.
Kabayatanna, pinasingkedan met ti karruba dagiti biktima a ni Medardo Pagal a kandela ti ar-aramatenda a silaw ti kalapaw a pagnanaedanda nga imparabaw ti lakay iti rabaw ti plywood a nakaipanan dagiti lupotda agingga idi nakaangotda ti nabaniit ken nakitada a maur-uram ti kalapaw ket insigida a rinespondeanda.
