VIGAN CITY – Naipilan ti kaso a panaglabsing iti Article 168 iti Revised Penal Code wenno ti Illegal Possession and use of false treasury or bank notes and other instruments of credit kontra ken ni ni Ann Lopez, agtawen iti sangapulo ket siam, taga-Balite, Calumpit, Bulacan a nakemmeg gapu ti panangigatangna ti peke a kuarta iti tiendaan ti ili a Sta. Maria.
Iti pannaki-uman ti Bombo Radyo Vigan ken ni Police Captain Joel Dasargo iti Sta. Maria Police Station, pinaglibakan ti suspek ti pammabasul kenkuana agsipud ta iti palawagna kadagiti pannakabagi ti linteg, naaramat laeng isuna babaen kadagiti naam-ammoda idiay Manila nga uppat a lalaki pakairamanan ti maysa a bakla a nang-pick up iti suspek ken ti kaduana pay idiay Bulacan a mapan ag-swimming ditoy Ilocos.
Segun iti suspek, binaon ida dagiti nangpick-up kadakuada a naka-van a gumatang iti sangagasut a pisos a gatad ti karne iti tiendaan ket idi nakagatangda, sinuklian met ida ti aglaklako iti PHP900.
Napanda pay iti bangir a pagtagilakoan a gimmatang iti PHP150 a gatad ti bagnet ket sangaribo a pisos manen ti imbayadda.
Nagbalaw ti immuna a naggatanganda no apay a sangaribo manen ti kuartada numan pay adda met naisukli kadakuada a PHP900.
Iti panangkita dagiti pannakabagi ti linteg iti wallet ti suspek ket natakuatan pay ti innem a piraso pay ti peke a sangaribo a pisos.
