VIGAN CITY – Nakemmeg idiay Brgy Calungbuyan, Galimuyod ni Jovelyn Pineda, agtawen iti duapulo ket innem a taga-San Nicolas, Candon City gapu ti pananglimlimona ken ni Catherine Aluyen, agtawen iti uppat a pulo ket tallo a taga-Brgy. Patac, Galimuyod.
Iti pannaki-uman ti Bombo Radyo Vigan ken ni P/Lt. Allan Reoliquio, Officer-in-charge ti Galimuyod Municipal Police Station, modus ti suspek ti agipa-order kadagiti grocery a mabalin ti pakpakauna a bayad sakbay ti pannakaideliver-na ken nagpammarang nga adda ikitna nga akin-kukua iti grocery store idiay Sta. Cruz.
Nupay kasta, napilitan ti biktima a mangted ti lima gasut a pisos a pakpakauna a bayadna idi October 28 ngem natakuatan met laeng ti biktima ti modus ti suspek.
Alas nuebe y media iti agsapa iti November1, nagparang ti suspek iti store ti biktima a nagkiddaw iti nayun a lima gasut a pisos nga inted met ti biktima ngem nagpatulongen tapno matiliw ti suspek.
Ginandat ti suspek ti naglibas babaen ti motorsiklona ngem tiniliw dagiti Brgy Official idiay Brgy Calungbuyan ken nakakustodia itan kadagiti pannakabagi ti linteg tapno sumango iti kaso nga estafa.
Datin a makawa-awat ti Galimuyod Municipal Police Station kadagiti reklamo inaig ti iligal nga aramid ti suspek a ti kangrunaan a targetna a lugar ket ti ili a Galimuyod ken Candon.
