VIGAN CITY – Nakaruaren iti isolation room ti Ilocos Sur Provincial Hospital- Gabriela Silang ti pasyente nga under monitoring iti novel coronavirus kalpasan ti sangapulo ket uppat nga aldaw a pannakai-quarantine na manipud idi January 29.
Segun ti agtawen ti dua pulo ket pito a pasyente, saanna nga impagarup nga agtalinaed iti isolation room ta simple laeng a panaggurigor ti napasaranna ken naladingitan agsipud ta naapektaran payen ti negosyona nga isu ti pangal-alaanda ti inaldaw a gastusenda gapu ti panangiquarantine da kenkuana.
Pinasingkedan na pay a natalged dagiti kabagyan na a naggapu idiay Hong Kong iti kangitingitan iti pangta ti nasao a virus.
Ingunamgunam na a saan nga agiwaras dagiti tao ti peke a damag ken agtalek laeng kadagiti mapagtalkan a paggapuan ti impormasion tapno awan iti pagam-amkan dagiti agindeg ditoy probinsiya a kas iti napasamak kenkuana nga aglalaok nga impormasyon iti nagwaras a nakaapekto kenkuana ken ti pamilya na.
