VIGAN CITY – Dead on arrival iti ospital ti maysa a service crew gapu iti pannakaaksidentena bayat a nakamotorsiklo iti national highway idiay Brgy. Baliw Daya, Sta. Maria.
Segun ti Sta. Maria Municipal Police Station, ti nagmaneho ti motorsiklo ket ni Kristina Deompoc, agtawen ti duapulo ket tallo, service crew iti Mang Inasal Narvacan nga agnaed idiay Brgy. Poblacion Sur, Sta. Maria.
Agpapabagatan a direksyon ni Deompoc bayat a nakamotorsiklo idin naawanan ti kontrol ti manibelana a gappuanan ti pannakaidungparna iti poste iti kuryente iti igid iti kalsada.
Nagsagaba ti dunor iti naduma-duma a paset ti bagina ken naipan iti Ilocos Sur District Hospital, Narvacan ngem naideklarar a dead on arrival babaen ti attending physicianna idinto a saan pay nga ammo nu mano ti gatad ti nadadael a paset ti luganna.
