--Ads--
VIGAN CITY – Nadunor ken naglemma ti nadumaduma a paset ti bagina ti maysa a nagmaneho iti motorsiklo gapu iti pannaka-aksidentena idiay Barangay Bacar, Magsingal, Ilocos Sur.
Nabigbig ti nagmaneho iti Yamaha Mio a motorsiklo a ni Lynsee Anne Reymundo Ruaburo, agtawen iti tallopulo ket maysa, taga-Barangay Sta. Monica, Magsingal.
Agpapa-abagatan ti motorsiklo idi nadanunna ti nakapasamakan ti insidente ket saan a nakontrol ti drayber ti manibela ti luganna ket naidarusdos iti kalsada.
Iti pannaki-uman ti Bombo Radyo Vigan ken ni Police Captain Rodel Ragasa, nakainom ti drayber ken awan ti suotna a helmet idi mapasamak ti aksidente.
-- ADVERTISEMENT --
Naipaagas iti ospital ti drayber gapu iti sinagrapna nga itan ket adda metten iti natalged a kasasaad.
