Babai a naglugan iti tricycle, naaksidente idiay Santa, kritikal ti kasasaad na

VIGAN CITY – Kritikal ti kasasaad ni Catherine Paladan nga agnaed idiay Bucalag, Santa gapu iti pannakaitupa ti ulona iti semento idiay Brgy Labut, Norte, Santa idi nagdinnungpar ti traysikel a naglugananda ti asawana a ni Victor Baldonado, agtawen ti dua pulo ket siam, iti SUV a minaneho ni Resurrecion America, agtawen ti innem a pulo ket tallo nga agnaed idiay Lower Bicutan, Taguig City.

Segun kenni PCapt. Samuel Reyes iti Santa Police station, agapapa-abagatan ti SUV ta sumang-at iti dalan ket saanna a nalasin ti nakasinnabetna a traysikel nga awan ti silawna.

Agsipud iti dayta, nagdinnungpar dagiti dua a lugan a poon iti nakadunuran ti biktima.

Ti agdama, agtaltalinaed iti intensive care unit ti biktima ta nakaro a fracture ti ulona kasta pay nga agruar ti dara iti lapayag ken ngiwatna.