VIGAN CITY – Datin a naibalud gapu iti iligal a droga ti babai kadagiti agkabsat a natiliw iti buy bust operation idiay Barangay Capangpangan, Vigan City a top 4 provincial target ti Philippine Drug Enforcement Agency.
Nabigbig dagiti suspek a da Karen Joy Criste Reduque ken ni Nikko Jay Criste Reduque nga agpada a positibo iti iligal a droga.
Iti pannaki-uman ti Bombo Radyo Vigan ken ni Noreen Bautista, Provincial Officer iti PDEA-Ilocos Sur, nakapag-plea bargain idi ti suspek iti kasona ngem idi napan a tawen ket namonitor manen a sinublianna ti iligal nga aramidna.
Nakagatang kenkuana dagiti operatiba iti maysa a gramo ti shabu nga aggatad iti innem a ribo a pisos.
Ti suspek ti mangar-aramid ti transaksyon wenno agilaklako kadagiti parokyanona idinto a ti kabsatna met ti mangipatpatulod kadagiti shabu.
Nagserbi a drug den ti pagtaenganda nga isu ti pap-papanan dagiti gumatang iti rumabii ken lugar payen a pagusaranda iti iligal a droga agsipud ta makita dagiti adu a nagbasutan iti foil ken nadumaduma a paraphernalia.
Naala manipud kadagiti suspek ti walo a heat-sealed transparent plastic sachet a naglaon iti mapapati a shabu nga agdagsen ti dua a gramo nga aggatad iti PHP14,000 ken uppat a piraso ti zip lock a naglaon iti marijuana dried leaves nga agdagsen ti limagasut a gramo nga aggatad ti PHP60,000.
Malaksid pay dayta, naala pay kadakuada dagiti naduma-duma a drug paraphernalia kas kuma iti maysa a piraso ti improvised toother, maysa nga improvised sealer, maysa a lighter, dua a getteng, tallo a coin purse, dua nga unit ti cellphone, maysa a shoe box, driver license, lima a piraso ti one thousand boodle money, ken maysa nga one thousand a buy bust money.
Sumango dagiti suspek iti kaso a panaglabsing ti RA 9165 wenno Comprehensive Dangerous Drugs Act of 2002.
