VIGAN CITY – Kinontra ni Sen. Christopher Lawrence “Bong” Go iti inbaga ti Commission on Human Rights a saan a tulbek iti dusa a bitay tapnu makissayan dagiti mapaspasamak a krimen ditoy pagilian.
Ti pannaki-uman ti Bombo Radyo Vigan, immunan nga inbaga ni CHR spokeswoman Atty. Jacqueline de Guia a ti panangsimpa iti justice system iti pagilian iti masapul nga asikasoen dagiti agpanpanday linteg, saan a ti panangisubli ti dusa a bitay.
Para ken ni Go iti pannaki-uman kenkuana ti Bombo Radyo idi nasangaili iti panaglukat ti MALASAKIT Center idiay Ilocos Sur Provincial Hospital- Gabriela Silang, inbaga na nga awan iti parikut iti justice system iti pagilian ta adda payen iti agliklikmut a Justice on Wheels a mangipakita a seryoso dagiti mahistrado a mangsolbar kadagiti nakapenpen a kaso kadagiti korte.
Kabayatanna, ti panagsarita ni Presidente Rodrigo Duterte iti inagurasyon ti by-pass road idiay Candon City idi July 25, inulit na iti suporta na iti kalikagum ni Go a maisubli iti dusa a bitay kontra kadagiti konektado ti iligal a droga ken panagkurimes iti pondo ket inbaga na a nu awan iti ilimlimed dagiti senador ken kongresista, awan iti pagbutngan da nu maisubli iti death penalty ditoy pagilian.
