Automated system manipud enrollment agingga graduation, maipatungpal idiay UNP

VIGAN CITY – Maysa kadagiti kalkalikaguman nga ipatungpal iti baro a presidente ti University of Northern Philippines a ni Dr. Erwin Cadorna ti automated a proseso ti panagenrol dagiti agad-adal.

Ti pannaki-uman ti Bombo Radyo Vigan ken ni Dr. Cadorna, ti nasao a gannuat ket gapu ta nakitana ti rigat dagiti agad-adal nga agpilpila iti nabayag, saan laeng a ti panagenrol nu di ket pati iti panagala ti transcript of records ken diploma isu a kayat na a ti panagtakem na ket lumag-an iti proseso manipud enrollment agingga graduation.

Malaksid iti dayta, nalaklakan to payen a makitransaksyon dagiti agad-adal ken dagiti graduates agsipud ta saan danton a mapan iti mismo UNP tapnu agenroll ken mangala kadagiti kasapulan da a dokumento nu di ket online transaction ton amin iti mapasamak.

Kabayatanna, inpakaammo na nga in-inuten a maikabkabil iti libre a wifi connection iti tunggal college idiay UNP tapnu adda iti aramaten dagiti agad-adal kadagiti naduma-duma a kasapulan da kadagiti courses da.

Namnamaen na nga agtitinnulong amin a teaching ken non-teaching personnel ti UNP tapnu maipatungpal dagiti kalikaguman na a development iti pagadalan.