VIGAN CITY – Maipatungpalton iti probinsia ti programa ti Land Transportation Franchising and Regulatory Board nga Automated Fare Collection System, baro a wagas ti panagkolekta iti plete kadagiti pampubliko a transportasyon kas ti bus, jeep, tren ken dadduma pay a daytoy ket immunan nga impatungpal ti Department of Transportation iti Railways System.
Gagem ti addang a pagbalinen a cashless, naannayas ken natalged wenno awan ti “contact” iti driver ken konduktor ti panagplete kadagiti pampubliko a lugan.
Iti pannaki-uman ti Bombo Radyo Vigan ken ni Lovely Garcia, Admin Staff ti Sunmi Infinite IT Solution, ti pay laeng ruta a Vigan to Narvacan vice versa ti pakairugian ti daytoy nga addang ket ti NICOLTSC ti umuna a kliyenteda.
Imbes a kuarta ti plete nga alaen dagiti drayber kadagiti pasahero ket mai-tap laengen ti card iti device a maikabil kadagiti lugan.
Magatang ti card iti gatad a sangagasut a pisos a daytoy ket addanto met a sigud ti karganan a limapulo a pisos. Kagiddan ti igagatang iti card ket mairehistronto payen ti nagan ken contact number ta no bilang mapukaw ket mabalin nga i-block tapnon saanen a mausar.
