Insigida a nagtignay ti gobierno ti Austria manipud pay idi nangrugi ti COVID-19 outbreak idiay China tapno maliklikanda iti nasao a sakit ken nakitinnulong dagiti agindeg kas pinasingkedan ni Bombo International Correspondent Maureen Amano nga adda tatta idiay Vienna.
Segun ken ni Amano, immuna nga impasarrada idi dagiti pagadalan ken dagiti establisimento sa nabalakadanda nga agtalinaed iti uneg ti pagtaengan ta makaruarda laeng no adda ti napateg a gagarada kas koma no mapanda gumatang iti taraon ngem adda ti oras a nakaituding a panaggatangda; no sumrek iti trabaho; ken no mapan tumulong kadagiti sabali a tao.
Kabayatanna, impanakkelna iti health care system ti pagilianda ta ti tunggal agindeg ket addaanda iti health insurance ta no kas man bilang mayospitalda ket awan ti bayadanda.
Manipud ti 16, 561 a pakabuklan a kaso iti COVID19 idiay Austria ket 13, 110 ti nalainganen ket limagasut walopulo ket siam dagiti natay.
